मनीषा दांडगेचा ‘खडतर प्रवास, जिद्द आणि यश’

 

उदगीर तालुका पत्रकार संघाचा
जीवन गौरव पुरस्कार सुरेश पुरी यांना जाहीर

SURESH PURI

औरंगाबाद, दिनांक 06: उदगीर तालुका पत्रकार संघाच्यावतीने सन २०१९-२०२० चे मराठवाडास्तरीय पत्रकारिता पुरस्कार जाहीर झाले आहेत. यामध्ये  डॉ. बाबासाहेब आंबेडकर मराठवाडा विद्यापीठ, औरंगाबाद येथील जनसंवाद व वृत्तपत्रविभागाचे प्रा. सुरेश पुरी यांना जीवनगौरव पुरस्काराने सन्मानित करण्यात येणार असल्याचे पत्रकार संघाचे अध्यक्ष राम मोतीपवळे व सचिव दयानंद बिरादार यांनी जाहीर केले. लवकरच मान्यवरांच्या हस्ते हा पुरस्कार वितरण सोहळा होणार असल्याचेही त्यांनी सांगितले.

उदगीर तालुका पत्रकार संघाच्यावतीने गत दहा वर्षापासून मराठवाडास्तरीय उत्कृष्ट वार्ता व शोध वार्ता या दोन गटातून पुरस्काराचे आयोजन केले जाते. पुरस्काराचे अकरावे वर्ष आहे. या वर्षी जाहीर झालेल्या पुरस्कारात

उत्कृष्ट वार्ता गटामध्ये‍ प्रथम पुरस्कार दैनिक सकाळचे उस्मानाबाद जिल्ह्यातील उमरगा बातमीदार अविनाश काळे यांच्या 'शेतमजूरी करुन शिक्षणासाठी घेतला फोन' या बातमीस अर्जुन मुद्दा यांच्यावतीने जेष्ठ पत्रकार कै.महादप्पा मुद्दा यांच्या स्मरणार्थ पाच हजार रुपये रोख रक्कम सन्मान चिन्ह, प्रमाणपत्र, व्दितीय पुरस्कार लातूर जिल्ह्यातील जळकोट तालुक्यातील वांजरवाडा येथील दैनिक पुण्यनगरीचे प्रतिनिधी विनोद गुरमे यांना 'रेणुकाच्या यशाला दु:खाची किनार' या बातमीस जेष्ठ संपादक निर्मलाताई बांगे यांच्यावतीने कै.वसंतराव बांगे यांच्या स्मरणार्थ तीन हजार रुपये रोख, सन्मान चिन्ह व प्रमाणपत्र, तृतीय पुरस्कार बीड जिल्ह्यातील माजलगावच्या दैनिक आदर्श गावकरीचे प्रतिनिधी ज्योतिराव पांढरपोटे यांच्या 'मिरची लागवडीतून एकरात चार लाखाचे उत्पन्न' या बातमीस पत्रकार दयानंद बिरादार यांच्यावतीने कै.नागनाथ बिरादार यांच्या स्मरणार्थ दोन हजार रुपये,सन्मानचिन्ह व प्रमाणपत्र देऊन सन्मानित करण्यात येणार आहे.

शोध वार्ता गटामध्ये प्रथम पुरस्कार दैनिक पुढारीचे उस्मानाबाद जिल्ह्यातील उमरगा येथील प्रतिनिधी शंकर बिराजदार यांच्या 'कुटुंबाच्या सुखदायिनीचेच आरोग्य धोक्यात' या बातमीस अर्जुन मुद्दा यांच्यावतीने जेष्ठ पत्रकार कै. महादप्पा मुद्दा यांच्या स्मरणार्थ पाच हजार रोख सन्मान चिन्ह व प्रमाणपत्र, व्दितीय पुरस्कार लातूर जिल्ह्यातील जळकोट तालुक्यातील घोणसी येथील दैनिक पुण्यनगरीचे प्रतिनिधी हणमंत केंद्रे यांच्या 'राजूने बनवले वायरलेस विद्युत यंत्र' या बातमीस स्वामी विवेकानंद महाविद्यालय वृत्तपत्र विद्या विभाग यांच्यावतीने रोख तीन हजार रुपये रोख, सन्मान चिन्ह, तृतीय पुरस्कार बापू नाईकवाडी जि.उस्मानाबाद यांच्या समय सारथी मधील 'गुराळामुळे परिसरातील शेकडो युवकांना रोजगार' या बातमीस पत्रकार  प्रशांत अपसिंगेकर यांच्यावतीने जेष्ठ पत्रकार कै.अनंत अपसिंगेकर यांच्या स्मरणार्थ रोख दोन हजार रुपये रोख सन्मानचिन्ह व प्रमाण पत्र देऊन गौरवण्यात येणार आहे.

या पुरस्काराच्या निवडीसाठी परीक्षक म्हणून लातूर येथील जिल्हा माहिती अधिकारी सुनील सोनटक्के, प्रा.शिवशंकर पटवारी व प्रा. डॉ.दत्ताहरी होनराव यांनी काम पाहिले.

*****