औरंगाबाद,दि.23- आदरणीय मित्र, उत्तम सहकारी, जगभरात कर्तृत्त्वाने राजकारणात ठसा उमटविणारे, देशाच्या अर्थव्यवस्थेत सुधारणा आणण्यासाठी पुढाकार घेणारे, देशासमोरील संकटे आदर्शवत पद्धतीने हाताळणारे माजी कृषीमंत्री शरद पवार यांच्या जीवन आणि कार्यावर आधारीत शेषराव चव्हाण लिखित ‘पद्मविभूषण शरद पवार : द ग्रेट इनिग्मा’ या चरित्रात्मक पुस्तकाचे सर्वांनी वाचन करायलाच हवे, असे प्रतिपादन माजी प्रधानमंत्री डॉ. मनमोहन सिंग यांनी आज केले.
शहरातील एमजीएम (महात्मा गांधी मिशन) च्या रुक्मिणी सभागृहात आयोजित पुस्तक प्रकाशन कार्यक्रमात डॉ. सिंग बोलत होते. माजी कृषीमंत्री तथा पद्मविभूषण शरद पवार, पुस्तकाचे लेखक शेषराव चव्हाण, एमजीएमचे अध्यक्ष कमलकिशोर कदम, विश्वस्त अंकुशराव कदम, सेवाग्राम येथील कस्तुरबा गांधी वैद्यकीय महाविद्यालयाचे अध्यक्ष धीरुभाई मेहता, डॉ. अफरोज अहमद, प्रतापराव बोराडे यांची यावेळी व्यासपीठावर उपस्थिती होती.
डॉ. सिंग म्हणाले, औरंगाबादच्या ऐतिहासिक अशा नगरीत येऊन मला आनंद झाला. जुने मित्र शरद पवार यांच्या जीवन आणि कार्यावरील पुस्तकातून अनेक बाबी वाचकांच्या समोर येतील. शरद पवारांनी देशाच्या जडणघडणीत मोलाचे योगदान दिलेले आहे. देशावर आलेल्या विविध संकटावर मात करत अत्यंत कुशलतेने त्यांनी सामोरे जाऊन परिस्थिती हाताळली. मग ती परिस्थिती मुंबई बॉम्बस्फोटासंदर्भातील असो वा लातूर जिल्ह्यातील भूकंपाशी संबंधित. चार वेळी महाराष्ट्राचे मुख्यमंत्रीपद भूषविलेल्या शरद पवारांनी उत्तमरित्या देशाचे संरक्षण मंत्री, कृषीमंत्रीपदही सांभाळले. देशाला आवश्यक असलेल्या बदलात महत्त्वाची भूमिका पार पाडली. तत्कालीन प्रधानमंत्री पी.व्ही. नरसिंहराव यांच्या कार्यकाळात केंद्रात वित्तमंत्री असताना पवार संरक्षण मंत्री होते. त्यावेळी देखील आर्थिक सुधारणांमध्ये त्यांनी अग्रक्रमाने पुढाकार घेतल्याचे, आवार्जून श्री. सिंग यांनी सांगितले. देशाच्या आर्थिक सुधारणांमध्ये त्यांचा माझ्याबरोबरीचा वाटा असल्याचेही ते म्हणाले. शरद पवार यांच्या कृतीशील अशा विचारांतून देशामध्ये मोठ्याप्रमाणात आवश्यक असणारे परिवर्तन झाले. फार कमी राजकारणी औद्योगिक विकासाला प्रोत्साहन देतात परंतु पवार यांनी औद्यौगिक विकासातही मोलाचे योगदान दिले. त्यामुळेच आज महाराष्ट्र औद्यौगिक विकासात अग्रेसर असल्याचेही श्री. सिंग यांनी सांगितले. शरद पवारांना उत्तम आरोग्य लाभो असे म्हणत पुढील वाटचालीसाठी देखील श्री. सिंग यांनी पवार यांना यावेळी शुभेच्छा दिल्या.
श्री. पवार यांनीदेखील जीवन चरित्रात्मक अशा या पुस्तकामागचा प्रवास यावेळी सांगितला. 50 वर्षांच्या सार्वजनिक जीवनात मराठवाड्याने मला आपले मानले, असे याठिकाणी आवर्जून सांगावेसे वाटते, असेही पवार म्हणाले. कै. यशवंतराव चव्हाण आणि कै. विनायकराव पाटील यांची सातत्याने साथ मिळाली. त्यांच्यामुळेच मला राजकारणात निवडणूक लढविण्याची संधी मिळाली, असेही ते म्हणाले. मराठवाड्यातील व्यक्तीने उत्तम, दर्जेदार अशाप्रकारे पुस्तकाची निर्मिती करणे याचा खूप आनंद वाटतो. मराठवाड्याशी माझा ऋणानुबंध पुर्वीपासूनच आहे आणि तो कायमच राहणार, असल्याचेही पवार यांनी यावेळी सांगितले.
पुस्तकाचे लेखक चव्हाण यांनी या संदर्भग्रंथाचा सर्वांनाच उपयोग होणार आहे. संशोधक, राजकीय नेते, लोकप्रतिनिधी, अभ्यासक,तरुणांना यामधून प्रेरणाच मिळेल, असे यावेळी सांगितले. श्री. मेहता यांनीही विचार मांडले.
सुरवातीला डॉ. सिंग, श्री. पवार यांचे कमलकिशोर कदम यांनी शाल, स्मृतीचिन्ह, पुस्तक आणि पुष्पगुच्छ देऊन स्वागत केले. अंकुशराव कदम यांनी डॉ. अहमद, शेषराव चव्हाण यांचा सत्कार केला. त्यानंतर डॉ. सिंग यांच्याहस्ते ‘पद्मविभूषण शरद पवार: द ग्रेट इनिग्मा’ पुस्तकाचे प्रकाशन करण्यात आले.
कार्यक्रमाचे प्रास्ताविक कमलकिशोर कदम यांनी केले. सूत्रसंचालन सारिका गाडेकर यांनी केले. आभार श्री. बोराडे यांनी मानले. कार्यक्रमास जिल्ह्यातील सर्व मान्यवर,साहित्यिक, लोकप्रतिनिधींची उपस्थिती होती .
------*****------
Comments